Du benytter en utdatert nettleser som Vinmonopolet.no ikke lenger støtter

Vennligst last ned en av følgende oppdaterte, gratis og gode nettlesere:

Vi ønsker deg velkommen igjen.

Drikketips til chicken tikka

drikke-til-chicken-tikka-artikkelbilde.jpg

Halvtørre kvitvinar er det klassike valet til indisk mat. Prøv ein chenin blanc frå Loire i Frankrike eller frå Sør-Afrika. Eit veldig utradisjonelt, men spennande val er mjød. Her får du våre drikketips til chicken tikka – marinert kylling i krydra saus.

Tekst:
Vinmonopolet

foto

Foto:
Getty Images

Indisk mat er krydra og ofte sterk. Blir drikken for spinkel og lett, forsvinn han heilt bak maten. Samtidig tek sterke smakar knekken på fine nyansar. Derfor kan dei aller flottaste vinane vente til eit anna høve.

Halvtørre kvitvinar er det klassike valet. Sødma har same funksjonen som ein raita. Han dempar og lindrar. Dersom du elskar flammen frå chilien, kan du velje meir alkoholsterke drikker. Alkohol forsterkar chilivarmen merkbart.

Kvitvin

Ein moden vin med saftig fruktigheit klarer å stå imot smaksintensiteten frå maten. Ikkje vel for spinkle vinar. For mellom 150 og 200 kroner finst det mykje som vil passe. Vel gjerne ein chenin blanc frå Loire i Frankrike eller frå Sør-Afrika. Ein pinot gris frå Alsace eller ein riesling med litt søtleik vil og passe bra.

Øl

Øl med lyst maltpreg og god nok friskleik er leskande til sterk mat. Aroma frå humle passar fint til indisk krydder. Pale Ale eller lyst lagerøl kan vere godt til. For den som er glad i surøl, verkar det forfriskande og reinsande. Vel gjerne eit med litt mørkare malt, som eit raudt flamsk øl.

Mjød

Mjød er laga på honning. No finst det fleire tørre variantar som kan vere eit originalt og spennande val til krydra mat.

Raudvin

Raudvin er ikkje eit førsteval. Varme krydder forsterkar tannin og gjer raudvin tråare og meir  snerpande. Om du likevel ønskjer raudvin, vel ein som har saftig frukt og lite snerp, gjerne frå eit varmare klima.

Alkoholfritt

I India er det mest vanleg å drikke vatn til maten, og det er ikkje eit dårleg val. Eplemost har òg mange eigenskapar som gjer seg godt til sterk mat. Det søte og det friske verkar leskande og varmedempande.

 

Oppskrift på chicken tikka

Dette treng du til fire porsjonar.

Marinade:

  • 1 dl naturell yoghurt
  • 2 fedd kvitløk
  • 50 g løk (kan sløyfast)
  • 1 ms ingefær
  • 3 ms sitronsaft
  • 1 ts salt
  • 1 ts chilipulver
  • 1 ms tomatpuré
  • 1/2 ts malen spisskum
  • 3/4 ts malne korianderfrø
  • 3 ms smelta margarin/olje
  • 1 kg kyllingfilet

Rasp løk, ingefær og kvitløk. Mal spisskum og korianderfrø. Del filetane i serveringsstykke. Bland alle ingrediensane, og legg kyllingen i marinaden natta over eller minst 4 timar. Lag små hakk i filetane slik at marinaden trekkjer inn.

Steik i 15–20 minutt på 225 °C midt i steikjeomnen. Snu filetane etter cirka 10 minutt.

Saus:

  • 4 ms olje
  • 1 fedd kvitløk
  • 1/2 ts malen spisskum
  • 1/4 ts muskatblome
  • 1/2 ts malen muskat
  • 150 g tomatar
  • 1/2 ts gurkemeie
  • Salt og chilipulver etter smak
  • 1 ms ingefær
  • 1 ms rømme
  • 1 dl kefir
  • 10 cashewnøtter
  • 1 ms finsnitta koriander

Hakk kvitløk, rasp ingefær, mal spisskum, knus tomatar, mal cashewnøtter til pulver, og finsnitt koriander. Varm olje. Ha i malen spisskum, muskatblome og muskat. Tilset tomatar, krydder og ingefær. La sausen koke i 2–3 minutt før du tilset rømme og kefir. Bland alt godt, og tilset malne cashewnøtter og steikte kyllingfiletar. La dei trekkje i sausen i 5 minutt før servering. Server med ris og eventuelt nanbrød.

Oppskrifta er henta frå kokeboka Indisk mat på norske fat av Niru Kumra.