Drikke til thaimat - laab moo

Heldigvis treng vi verken å tømme lomme­boka eller brenne uhyrlege mengder drivstoff for å kunne oppleve thaimat. Med oppskriftene Andreas Ingul har laga til Vinbladet denne gongen, kan du invitere Thailand heim på ditt eige kjøkken. Dei fleste ingrediensane du treng, er ganske greie å finne – i alle fall om du bur i nærleiken av ein asiatisk matbutikk. Sjølv vanlege daglegvarekjeder har etter kvart eit brukbart utval.

Bondekjøkken, gatemat og gourmetmat

Andreas Ingul har reist i Thailand og ­fortel gjerne og begeistra om matkulturen. 

– Thaimat har alt – ferske, sunne ingrediensar med mykje smak, spanande konsistensar og balanse mellom syrleg, søtt, sterkt og fiskeaktig, seier han. At maten blir presentert på ein vakker og fargerik måte, gjer han endå betre.

Prøv Andreas sine oppskrifter:

• Fiskekaker med papayasalat
• Khao soi (kyllingkarri frå Chiang Mai)
• Laab Moo (salat med svin)
• Thai-mocktail

Drikke til thaimat – ein leik med smak!

Rettane Andreas Ingul har laga for Vinbladet denne gongen, er aromatiske på kvar sin måte. Dei er robuste og blir ikkje så lett overkøyrde av drikken. Det gir deg eit glimrande høve til å teste noko nytt og utvide perspektivet på mat og drikke i kombinasjon. 

Syre og aroma er dei viktigaste elementa å ta omsyn til når du skal velje drikke til thaimat. Syra i maten gjer at drikken òg bør ha godt med syre, elles kan han verke dvask. Søtleik dempar chilien litt. For sjølv om du liker at munnen står i brann, kan det vere godt å la han få ein pause når varmen byggjer seg opp. Drikke med bobler eller veldig mykje syre kan forsterke chilieffekten, men opnar òg for smakane i maten.

Likskap heller enn kontrast

Drikke blir som ein ekstra ingrediens i maten. Elementa i thairettar er vanlegvis godt balanserte. At maten ikkje manglar noko, gjer at drikke som aromamessig har mykje sams med maten, vil fungere best. Derfor er det generelt lettare med kvitvin enn raudvin. Kvitvin med rein og fersk fruktigheit, gjerne eit modent fruktpreg av til dømes aprikos eller fersken, eller blomsteraktige aromaer er fint følgje. 

Kjølig raudvin

Raudvin kan òg passe, først og fremst til innkokte karrirettar. God syrefriskleik og aroma er i så fall gode eigenskapar, mens fatpreg lett blir for dominerande. Avkjøl vinen godt, så kjem friskleiken betre fram. 

Øl 

Ekstreme øl tilsette tropiske frukter av alle slag kan passe godt saman med nokre av dei smaksrike thairettane. IPA og NEIPA med mykje humle gir spenstige kombinasjonar, men ølet bør ikkje vere altfor bittert. I Thailand serverer ein ofte lett og iskald pils.

Alkoholfritt 

Sist, men ikkje minst, er alkoholfrie drikkar eit godt matfølgje. Fruktjuice, limonadar og alkoholfrie cocktailar har eit ferskt fruktpreg som passar godt. Ein kopp blomsterduftande sjasminte er ein god match til steikt mat og innkokte karrirettar. 

Drikke til laab moo

Retten er syrleg og litt chilivarm. Aroma frå urter som thaibasilikum gir tonar av anis og kamfer. Salaten har fersk smak og sprø konsistens. Risen dempar smakane litt.

Kvitvin av Riesling er klassisk, gjerne ein rimeleg variant med enkel, rein sitrusfruktigheit og eventuelt litt restsøtleik. Tørr, fruktig Sauvignon Blanc med mykje aroma passar til urtepreget i maten. 

Norsk sider med syre og litt søtleik, reint og ferskt eplepreg. 

Øl med mykje aroma, til dømes NEIPA. Litt grep frå humlen strammar opp maten og gir urteaktig fruktigheit.

Alkoholfri IPA, ingefærøl eller limo­na­de har aroma som passar.

Vin frå Thailand 

Vinmarkene i Thailand blei først planta til i 1960-åra. Først var det berre matdruer, men dei siste 30–40 åra er det òg planta Vitis vinifera til vinproduksjon. Klimaet er generelt varmt og fuktig, med mindre temperaturforskjellar gjennom året og døgnet enn i Europa. Området Phu Ruea i nordaust og Khao Yai nord for Bangkok er dei viktigaste vinområda i dag. Særleg druetypen Shiraz blir brukt, men også Malaga Blanc (Semillon), Muscat, Chenin Blanc, Tempranillo og Sauvignon Blanc. 

Vinene har tradisjonelt vore fruktige og med ein del restsøtleik, tilpassa krydra thaimat. Den seinare tida har det i større grad vore laga friskare og tørrare vinar.